Алматыда «Ұлы Жібек жолындағы Жаратылыс мадақтары» атты кітаптың тұсаукесері мен оған арналған фотокөрменің ашылуы өтті. Шарада Әссиздік Әулие Францисктің әйгілі «Жаратылыс мадақтары» поэмасы алғаш рет қазақ тілінде таныстырылды.
Бұл кештің ерекше болу себебі — XIII ғасырда жазылған, әлемнің үйлесімі мен Жаратылыстың сұлулығын жырлаған поэма Ұлы Даланың рухымен табиғи үндесіп, Италия мен Қазақстан арасындағы жаңа мәдени көпірге айналды.
Басылымға поэманың үш тілдегі мәтіндері, авторлық ой-толғамдар және Сарра Есенбайдың 27 көркем иллюстрациясы енді.
Кеш барысында Эдоардо Кризафулли, Роллан Сейсенбаев, Қорғанбек Аманжол және Сарра Есенбай жоба тарихымен бөлісті.
Осындай мәнді де жылы кешті бірге өткізген барлық қонақтарға алғыс айтамыз — поэманың әсемдігін, оның Ұлы Даладағы жаңа сапарын бірге бөліскендеріңіз үшін рақмет!
